Mjög góð sala hefur verið í hrossum síðustu vikur og mánuði og mikið um fyrirspurnir.  Þó nokkur hross bíða útflutnings og týnist úr hópnum smá saman.

Þriggja vetra Glampadóttirin Áróra frá Strandarhöfði  er farin til nýrra eigenda í Þýskalandi.   

Siðustu dagana hafa haustlægðirnar gengið yfir eins og enginn sé morgundagurinn! Þau voru því hvíldinni fegin folöldin,þegar rofaði aðeins til.  Þau voru búin að standa og híma í rigningarbeljandanum.  Nú lágu þau sofandi í sólinni  og létu ekki einu sinni ljósmyndarann trufla hvíldina.

Sá skjótti, Dimmskjóni er undan Dimmu frá Strandarhöfði og Kletti frá Hvammi og er óðum að verða gráskjóttur.  Nafngift hans var nokkurskonar grín í upphafi en hefur loðað við hann...Það verður skondið þegar hann verður orðinn alhvítur!

Heldur hefur heimasíðan legið niðri síðustu vikur, en við höfum verið ærið upptekin við haustverkin á búinu.  Það er búið að smala á flestum bæjum hér í kring, en eins og kannski flestir vita, þá eiga Landeyingar ekki afrétt og féð gengur í úthögum.  Réttarstemmning í Landeyjunum gengur því meira út á að skutlast milli bæja til að sækja kindurnar sínar og sötra kaffi saman.