Mikið hefur borið á þeim hvimleiða gest, músinni, nú í haust.  Ástandið var orðið svo slæmt nú um jólin að fjölskyldan ákvað að nú væri komin tími til að ráða nýjan starfskraft í hesthúsið í Reykjavík, það er að segja músabana.  Leituðum við til Kattholts, en þar má finna fjöldan allan af gæðaköttum á ýmsum aldri.  Við völdum stóran og stæðilegan Persablandaðan fresskött sem hafði komið í Kattholt um miðjan nóvember og án þess að hans væri vitjað.  Við vildum miklu frekar gefa óskilaketti nýtt heimili heldur en að fá okkur einhvern krúttlegan kettling, enda þarf nokkuð þroskaðan kött til að takast á við svona músahjörð.  Fékk hann nafnið Ljóni og  er  nú búinn að koma sér vel fyrir á kaffistofunni í Víðidalnum.  Honum finnst hestarnir ennþá fremur ógnvekjandi en kann því vel hversu mikið er um öllu minni dýr, eða mýsnar.   Auðvitað flyst Ljóni síðan með okkur austur í Strandarhöfuð þegar starfsemin flyst þangað í vor og fær hann þá að kynnast frelsinu í sveitinni.

Ársól er undan Sjönu frá Höfðabakka og Kletti frá Hvammi og er því alsystir Einis frá Höfðabakka sem skoða má betur hér á síðunni undir "stóðhestar".   Ársól er fædd brúnskjótt en er nú þegar farin að lýsast og verður fljótt gráskjótt.  Við viljum óska þeim í Skriðu til hamingju með hana Ársól og vonum að hún verði þeim til happs og Strandarhöfði til sóma.